સાબરકાંઠા જિલ્લામાં ચાંદીપુરા વાયરસના રોગચાળાને પગલે જિલ્લા વહીવટી તંત્ર અને આરોગ્ય શાખા એલર્ટ થઈ ગઈ છે. સરકારી માર્ગદર્શિકા અનુસાર જિલ્લા કલેક્ટર અને જિલ્લા વિકાસ અધિકારી (DDO) ના સીધા માર્ગદર્શન હેઠળ જિલ્લામાં વાયરસના સંક્રમણને રોકવા માટે સઘન અને સંકલિત કામગીરી હાથ ધરવામાં આવી છે.
૧ પોઝિટિવ કેસ, ૫ શંકાસ્પદ કેસ નેગેટિવ આવતા રાહત
મળતી માહિતી મુજબ, ગત ૬ જુલાઈ ૨૦走૬ થી આજદિન સુધીમાં પોશીના તાલુકાના ગણેર ગામમાં ૧ બાળકનો ચાંદીપુરા વાયરસનો રિપોર્ટ પોઝિટિવ આવ્યો છે. જો કે, રાહતના સમાચાર એ છે કે તલોદ, વડાલી અને વિજયનગર તાલુકામાંથી મળેલા અન્ય ૫ શંકાસ્પદ કેસોના રિપોર્ટ નેગેટિવ આવ્યા છે, જે જિલ્લામાં રોગચાળો નિયંત્રણ તરફ હોવાના સકારાત્મક સંકેતો આપે છે.
૧૨ ગામો પર વહીવટી તંત્રની ખાસ નજર
વર્ષ ૨૦૨૪ દરમિયાન જિલ્લામાં નોંધાયેલા ૬ પોઝિટિવ કેસના ૫ ગામો અને હાલના રોગચાળા દરમિયાન પ્રભાવિત થયેલા ૩ તાલુકાના ૭ ગામો મળીને કુલ ૧૨ ગામોમાં વિશેષ આરોગ્યલક્ષી પ્રવૃત્તિઓ ચાલી રહી છે. આ અસરગ્રસ્ત વિસ્તારોમાં અત્યાર સુધીમાં ૩,૯૯૪ ઘરોનો સર્વે કરીને કુલ ૨૧,૫૯૧ નાગરિકોની આરોગ્ય તપાસ (હેલ્થ સ્ક્રીનિંગ) કરવામાં આવી છે.
ખાનગી અને સરકારી તબીબો સાથે કલેક્ટરની બેઠક
રોગચાળાની ગંભીરતાને ધ્યાને રાખી જિલ્લા કલેક્ટરે સરકારી તેમજ ખાનગી તબીબો સાથે બે મહત્વપૂર્ણ વીડિયો કોન્ફરન્સ યોજી હતી. આ બેઠકમાં રોગની વહેલી ઓળખ, સચોટ સારવાર પ્રોટોકોલ, મજબૂત સર્વેલન્સ અને દર્દીઓને ઝડપથી રીફર કરવા માટેની સિસ્ટમ અંગે જરૂરી માર્ગદર્શન આપવામાં આવ્યું હતું.
“ચાંદીપુરા વાયરસ સામેની લડતમાં તંત્ર સંપૂર્ણ સજ્જ છે. સરકારી અને ખાનગી તબીબો વચ્ચે મજબૂત સંકલન સાધીને વહેલી ઓળખ તેમજ સમયસર સારવાર પૂરી પાડવી એ અમારી પ્રાથમિકતા છે. જો નાગરિકો પણ સાવચેતી રાખે અને સહકાર આપે તો આ રોગચાળાને જડમૂળથી નિયંત્રણમાં લાવી શકાય તેમ છે.”
— જિલ્લા કલેક્ટર, સાબરકાંઠા
યુદ્ધના ધોરણે વેક્ટર કંટ્રોલ અને જનજાગૃતિ અભિયાન
આ વાયરસ ફેલાવનારી સેન્ડફ્લાય (રેતીમાખી) ના નિયંત્રણ માટે આરોગ્ય વિભાગ દ્વારા યુદ્ધના ધોરણે કામગીરી હાથ ધરાઈ છે:
- ૧,૬૩૧ કાચા મકાનો અને ૨,૧૯૦ પાકા મકાનોમાં મેલાથિયોન ડસ્ટિંગ કામગીરી કરવામાં આવી.
- ૧૬૪ સંવેદનશીલ ઘરોમાં જંતુનાશક દવાનો છંટકાવ કરાયો.
- ગ્રામ્ય કક્ષાએ હેલ્થ મીટિંગો યોજીને ૫,૫૦૦ થી વધુ માહિતી પત્રિકાઓનું વિતરણ કરાયું. ઉપરાંત, સોશિયલ મીડિયાના માધ્યમથી લક્ષણો અને બચાવની વિગતો લોકો સુધી પહોંચાડવામાં આવી રહી છે.
મુખ્ય જિલ્લા આરોગ્ય અધિકારીની અપીલ: ‘સાવચેતી એ જ બચાવ’
મુખ્ય જિલ્લા આરોગ્ય અધિકારીએ નાગરિકોને ખાસ અપીલ કરતા જણાવ્યું છે કે, જો બાળકોમાં તાવ, ઉલ્ટી, બેહોશી કે ખેંચ (આંચકી) જેવા લક્ષણો દેખાય, તો જરાય સમય બગાડ્યા વિના નજીકના સરકારી આરોગ્ય કેન્દ્રનો સંપર્ક કરવો. આ સાથે જ ઘરમાં સ્વચ્છતા રાખવા, દીવાલોની તિરાડો પૂરી દેવા (જ્યાં માખી ભરાઈ રહે છે) અને આરોગ્ય ટીમને યોગ્ય સહકાર આપવા વિનંતી કરી છે.
About the Author
