હિંમતનગર: સાબરકાંઠા જિલ્લા મથક હિંમતનગર ખાતે જિલ્લા કલેક્ટર લલિત નારાયણ સિંઘ સાદુંના અધ્યક્ષસ્થાને એક મહત્વપૂર્ણ બેઠક યોજાઈ હતી. તા. ૦૧/૦૧/૨૦૨૭ ની લાયકાતની તારીખના સંદર્ભમાં જિલ્લામાં મતદાન મથકોનું પુનર્ગઠન કરવા અંગે આ બેઠકમાં માન્યતા પ્રાપ્ત રાજકીય પક્ષોના પ્રતિનિધિઓ સાથે વિસ્તૃત ચર્ચા-વિચારણા કરવામાં આવી હતી.
બેઠક દરમિયાન કલેક્ટર લલિત નારાયણ સિંઘ સાદુંએ જણાવ્યું હતું કે, આગામી સમયમાં યોજાનારી ચૂંટણીઓમાં મતદારોને મતદાન કરવામાં કોઈ પણ પ્રકારની મુશ્કેલી ન પડે અને ભૌગોલિક અનુકૂળતા જળવાઈ રહે તે માટે મતદાન મથકોનું પુનર્ગઠન કરવું અત્યંત જરૂરી છે. તેમણે આ સમગ્ર પ્રક્રિયાને કાયદાકીય જોગવાઈઓ અનુસાર સમયસર અને સંપૂર્ણ પારદર્શક રીતે પૂર્ણ કરવા પર ભાર મૂક્યો હતો. કલેક્ટરે તમામ રાજકીય પક્ષોના પ્રતિનિધિઓને વહીવટી તંત્રને સહયોગ આપવા અને પોતાના રચનાત્મક સૂચનો રજૂ કરવા માટે અપીલ કરી હતી.
આ બેઠકમાં વિવિધ માન્યતા પ્રાપ્ત રાજકીય પક્ષોના હોદ્દેદારો અને પ્રતિનિધિઓ ઉપરાંત પ્રાંત અધિકારીઓ સહિત વહીવટી તંત્રના વિવિધ અમલીકરણ અધિકારીઓ ઉપસ્થિત રહ્યા હતા, જેમની હાજરીમાં મતદાન મથકોના પુનર્ગઠનની દરખાસ્તો અંગે ગંભીર મંથન કરવામાં આવ્યું હતું.
About the Author
