- શેઠ કે. ટી. હાઈસ્કૂલ ખાતે જિલ્લાકક્ષાના પર્વમાં દેશભક્તિનો અનોખો માહોલ સર્જાયો
- ૨૦૪૭ સુધીમાં ભારતને વિકસિત રાષ્ટ્ર બનાવવા દરેક નાગરિક યોગદાન આપે: પ્રભારી મંત્રીનું આહ્વાન
- પોલીસ જવાનોની પરેડ, યોગ-કરાટે નિદર્શન અને શાળાઓના સાંસ્કૃતિક કાર્યક્રમો આકર્ષણનું કેન્દ્ર બન્યા
સાબરકાંઠા જિલ્લાના ખેડબ્રહ્મા સ્થિત શેઠ કે. ટી. હાઇસ્કુલના પ્રાંગણમાં 80મા સ્વાતંત્ર્ય પર્વની જિલ્લાકક્ષાની દબદબાભેર ઉજવણી સંપન્ન થઈ હતી. જિલ્લા પ્રભારી મંત્રી ડૉ. પ્રદ્યુમન વાજાએ શાનદાર વાતાવરણમાં ધ્વજારોહણ કરી તિરંગાને સલામી અર્પી હતી. તેમણે ભવ્ય પરેડનું નિરીક્ષણ કરી ઉપસ્થિત વિશાળ જનમેદનીને સંબોધન કર્યું હતું.
રાષ્ટ્ર પ્રથમના ભાવ સાથે વિકસિત ભારતનો સંકલ્પ પ્રભારી મંત્રીએ સ્વાતંત્ર્ય સેનાનીઓના સર્વોચ્ચ બલિદાનને યાદ કરતાં જણાવ્યું કે, “આઝાદીનું આ પર્વ લાખો શહીદોના સમર્પણની અમર ગાથા છે. મહાત્મા ગાંધીના સ્વરાજના સંકલ્પને આગળ વધારી વડાપ્રધાન શ્રી નરેન્દ્રભાઈ મોદીના નેતૃત્વમાં દેશ આજે સ્વરાજથી સુરાજ તરફ અગ્રેસર છે.” તેમણે ઉમેર્યું કે ભારત ૧૧મા ક્રમથી હરણફાળ ભરી વિશ્વની ચોથી સૌથી મોટી અર્થવ્યવસ્થા બની ચૂક્યું છે અને વર્ષ ૨૦૪૭ સુધીમાં ‘વિકસિત ભારત’ના નિર્માણ માટે પ્રત્યેક નાગરિકે પોતાનું યોગદાન આપવું અનિવાર્ય છે.
સાબરકાંઠાના વિકાસ માટે ₹૨૫ લાખની ભેટ ગુજરાતના સર્વાંગી વિકાસ અને જનકલ્યાણકારી યોજનાઓનો ઉલ્લેખ કરતાં મંત્રીશ્રીએ જણાવ્યું કે આયુષ્યમાન ભારત, ઉજ્જવલા, જનધન અને પીએમ સૂર્ય ઘર યોજનાઓમાં રાજ્ય અગ્રેસર રહ્યું છે. સાબરકાંઠા જિલ્લાના વિકાસની વાત કરતાં તેમણે હિંમતનગર-ખેડબ્રહ્મા બ્રોડગેજ લાઇન, ધરોઈ ભાગ-૨ પીવાના પાણીની યોજના અને બટાકાના ખેતી ઉત્પાદનમાં થયેલા વધારાને બિરદાવ્યા હતા. આ તબક્કે તેમણે જિલ્લાના વિકાસ કામો માટે ₹૨૫ લાખનો ચેક જિલ્લા કલેક્ટરને અર્પણ કર્યો હતો.
સાંસ્કૃતિક પ્રસ્તુતિઓ અને માર્ગ સલામતીનો સંદેશ
- દેશભક્તિના રંગો: શેઠ કે. ટી. હાઈસ્કૂલ અને સંત શ્રી નથુરામ બાપા જ્યોતિ હાઈસ્કૂલના વિદ્યાર્થીઓએ દેશભક્તિ ગીતો પર નૃત્ય પ્રસ્તુત કર્યા હતા, જ્યારે આંગણવાડીના ભૂલકાંઓએ ‘ગરવી ગુજરાત’ની ઝાંખી કરાવી હતી.
- શૌર્ય અને આત્મરક્ષા: જિલ્લા પોલીસની સુરક્ષા સેતુ સોસાયટી અને મહિલા પોલીસ ટીમે સૂર્યનમસ્કાર, યોગ અને કરાટેના દિલધડક કરતબો રજૂ કર્યા હતા.
- જનજાગૃતિ: આરટીઓ કચેરી દ્વારા માર્ગ સલામતી પર નાટક રજૂ કરાયું હતું અને સૌને ટ્રાફિક નિયમોના પાલનના શપથ લેવડાવવામાં આવ્યા હતા.
વિશિષ્ટ કામગીરીનું બહુમાન અને વૃક્ષારોપણ કાર્યક્રમના ઉત્તરાર્ધમાં ઉત્કૃષ્ટ સેવા આપનાર અધિકારીઓ, કર્મચારીઓ અને રમતવીરોનું સન્માન કરાયું હતું. મંત્રીશ્રીએ માર્ગ સલામતી હેતુ ટોઈંગ વાનને લીલી ઝંડી આપી પ્રસ્થાન કરાવ્યું હતું તેમજ વૃક્ષારોપણ કરી પર્યાવરણ જતનનો સંદેશ આપ્યો હતો.
આ રાષ્ટ્રીય મહોત્સવમાં જિલ્લા પંચાયત પ્રમુખ રીનાબેન પટેલ, ખેડબ્રહ્મા નગરપાલિકા પ્રમુખ ડૉ. પ્રિયંકાબેન ખરાડી, સાંસદ શોભનાબેન બારૈયા, ધારાસભ્ય વી. ડી. ઝાલા, ગજેન્દ્રસિંહ પરમાર, જિલ્લા કલેક્ટર લલિત નારાયણ સિંઘ સાંદુ, જિલ્લા પોલીસ વડા ડૉ. પાર્થરાજસિંહ ગોહિલ સહિતના પદાધિકારીઓ, અધિકારીઓ અને મોટી સંખ્યામાં નગરજનો ઉત્સાહભેર જોડાયા હતા.
About the Author
