મોટી કાર્યવાહી: ઈડર ગ્રામ્ય વિસ્તારના રોડ પરથી બાતમીના આધારે પોલીસે દારૂ ભરેલી લક્ઝુરિયસ ટાટા હેરિયર કાર ઝડપી પાડી.
દારૂનો જથ્થો: રાજસ્થાનથી ગુજરાતમાં ઘુસાડાતો અંદાજે ₹2.70 લાખથી વધુની કિંમતનો વિદેશી દારૂ ઝડપાયો.
કુલ મુદ્દામાલ: કાર અને દારૂ સહિત અંદાજે કુલ ₹14 લાખથી વધુનો મુદ્દામાલ પોલીસે કબજે કર્યો.
પાયલોટિંગ નેટવર્ક: કારની આગળ બે ટુ-વ્હીલર ચાલકો પાયલોટિંગ કરી રહ્યા હતા.
ધરપકડ અને વોન્ટેડ: કારમાં સવાર એક શખ્સ ઝડપાયો, જ્યારે કાર ચાલક અને બંને બાઇક સવારો સ્થળ પરથી ફરાર.
સાબરકાંઠા જિલ્લાના ઈડર ગ્રામ્ય વિસ્તારમાં પોલીસે બાતમીના આધારે ફિલ્મી ઢબે વોચ ગોઠવીને લક્ઝુરિયસ હેરિયર કારમાંથી વિદેશી દારૂની મોટી હેરાફેરીનો પર્દાફાશ કર્યો છે. રાજસ્થાન તરફથી ગુજરાતમાં ઘુસાડવામાં આવી રહેલા અંદાજે ₹2.70 લાખથી વધુની કિંમતના દારૂના જથ્થા સાથે પોલીસે કાર અને મુદ્દામાલ મળી કુલ ₹14 લાખથી વધુનો સપાટો બોલાવ્યો છે.
મળતી માહિતી મુજબ બુટલેગરો દ્વારા પોલીસથી બચવા માટે લક્ઝુરિયસ કારની આગળ બે ટુ-વ્હીલર ચાલકો દ્વારા પાયલોટિંગ કરાવવામાં આવી રહ્યું હતું. જોકે, ઈડર પોલીસની સતર્કતા જોઈને પાયલોટિંગ કરનારા બંને બાઇક ચાલકો તેમજ હેરિયર કારનો ચાલક નાસી છૂટવામાં સફળ રહ્યા હતા, જ્યારે કારમાં સવાર અન્ય એક શખ્સને પોલીસે ઝડપી લીધો હતો.
ઈડર પોલીસે પ્રોહિબિશન એક્ટ હેઠળ ગુનો નોંધી ફરાર આરોપીઓની શોધખોળ હાથ ધરી છે. આ દારૂનો જથ્થો રાજસ્થાનમાં કોની પાસેથી લાવવામાં આવ્યો હતો અને ગુજરાતમાં ક્યાં સપ્લાય કરવાનો હતો તે દિશામાં પોલીસે તપાસના ચક્રો ગતિમાન કર્યા છે.
About the Author
