ઈડર ખાતે યોજાયેલી ૩૬મી વાર્ષિક સાધારણ સભામાં રૂ. ૨.૫૫ કરોડના ચોખ્ખા નફા સાથેના હિસાબો સર્વાનુમતે મંજૂર; ખેડૂતોના હિત અને ગુણવત્તાયુક્ત ખેતી પર અપાયો ભાર
સ્થાનિક ઈડર ખાતે ધી સાબરકાંઠા જિલ્લા સહકારી દિવેલા તેલીબિયાં ઉત્પાદક સંઘ લિ. (સાબર દિવેલા સંઘ) ની ૩૬મી વાર્ષિક સાધારણ સભા તાજેતરમાં સંપન્ન થઈ હતી. આ સભામાં સંઘ દ્વારા હાંસલ કરવામાં આવેલી નાણાકીય સિદ્ધિઓ, ભવિષ્યના આયોજનો અને ખેડૂતલક્ષી કામગીરીનો વિસ્તૃત અહેવાલ રજૂ કરવામાં આવ્યો હતો.
નાણાકીય વર્ષ ૨૦૨૫-૨૬ ના અહેવાલ મુજબ, ૩૧ માર્ચ ૨૦૨૬ ના રોજ પૂર્ણ થયેલા હિસાબી વર્ષ દરમિયાન સંઘે ઐતિહાસિક નાણાકીય કામગીરી નોંધાવી છે. સભામાં રજૂ કરાયેલા સત્તાવાર આંકડાઓ અનુસાર, સંઘ દ્વારા વર્ષ દરમિયાન કુલ રૂ. ૩૯૩,૪૫,૪૧,૩૩૩ (આશરે રૂ. ૩૯૪ કરોડથી વધુ) નો વિક્રમજનક વેપાર કરવામાં આવ્યો છે, જે સ્થાનિક સહકારી માળખા માટે એક નોંધપાત્ર સિદ્ધિ છે.
સંઘની નફાકારકતા અંગે માહિતી આપતા સભામાં જણાવાયું હતું કે, આ જંગી વેપારમાંથી સંઘે રૂ. ૩,૬૬,૨૨,૨૫૧ નો વેપારી નફો મેળવ્યો છે. આ ઉપરાંત અન્ય આવક પેટે રૂ. ૫૮,૦૭,૨૧૧ ની કમાણી થતાં, સંઘનો કુલ નફો રૂ. ૪,૨૩,૬૮,૫૬૦ નોંધાયો હતો.
પેટાકાયદાની મર્યાદામાં થયેલા ખર્ચ બાદ સંઘનો ચોખ્ખો નફો રૂ. ૨,૫૫,૩૩,૭૩૧ રહ્યો છે. ભવિષ્યના આયોજન અને વિકાસલક્ષી કામગીરીને ધ્યાનમાં રાખીને રૂ. ૨,૫૧,૫૦,૦૦૦ ની જોગવાઈ સાથેનું સરપ્લસ બજેટ સભાસદો સમક્ષ રજૂ કરાયું હતું. સભામાં રજૂ કરાયેલા કામકાજનો અહેવાલ, વેપાર પત્રક, નફા-નુકસાન પત્રક અને સરવૈયાને સભાસદો દ્વારા સર્વાનુમતે મંજૂરી આપવામાં આવી હતી.
સભાસદો અને ખેડૂતો માટે એક મહત્વપૂર્ણ નિર્ણય લેતાં સાબર દિવેલા સંઘે આ વર્ષે ૧૫ ટકા લેખે ઐતિહાસિક ડિવિડન્ડ આપવાની જાહેરાત કરી છે. વધુમાં, ટેકાના ભાવથી ખરીદીની પ્રક્રિયામાં જોડાયેલા ૨૨ અન્ય સંઘોના ચેરમેનો દ્વારા સાબર દિવેલા સંઘના ચેરમેન અશોકભાઈ પટેલ અને મેનેજિંગ ડિરેક્ટરનું તેમની ઉત્કૃષ્ટ કામગીરી બદલ વિશેષ સન્માન કરવામાં આવ્યું હતું.
આ ૩૬મી સાધારણ સભામાં સહકારી અને રાજકીય ક્ષેત્રના અનેક અગ્રણીઓ ઉપસ્થિત રહ્યા હતા. કાર્યક્રમમાં મુખ્ય મહેમાન તરીકે સિદ્ધાર્થ પટેલ, મોડાસાના ધારાસભ્ય ભીખુસિંહ પરમાર અને પૂર્વ સાંસદ દીપસિંહ રાઠોડે ખાસ હાજરી આપી હતી.
તેમની સાથે સાબરડેરીના ચેરમેન શામળભાઈ પટેલ, સાબરકાંઠા બેન્કના ડિરેક્ટર સતિષભાઈ પટેલ, ખેતી બેન્કના ફલજીભાઈ પટેલ, પૂર્વ તાલુકા પંચાયત પ્રમુખ ધીરુભાઈ પટેલ, વડાલી એ.પી.એમ.સી.ના વિજયભાઈ પટેલ, સાબરડેરીના ડિરેક્ટર રામજીભાઈ પટેલ, ઈડર પાંજરાપોળના પ્રમુખ પી.સી. પટેલ અને કે.સી. પટેલ તથા વસઈના પૂર્વ સરપંચ હરિભાઈ પટેલ સહિતના મહાનુભાવો મંચ પર ઉપસ્થિત રહ્યા હતા.
ઈડર તાલુકાની વિવિધ સહકારી મંડળીઓના પ્રતિનિધિઓ અને ખેડૂતો મોટી સંખ્યામાં આ સભામાં જોડાયા હતા. સંઘના ચેરમેન અશોકભાઈ પટેલે તમામ મહેમાનોનું સ્વાગત કર્યું હતું. સભા દરમિયાન સહકારી પ્રવૃત્તિઓ, ખેડૂતોને સ્પર્શતા વિવિધ મુદ્દાઓ અને આગામી વર્ષના આયોજન અંગે વિસ્તૃત ચર્ચા કરવામાં આવી હતી.
સભામાં કૃષિ ક્ષેત્રની વર્તમાન પરિસ્થિતિ અંગે ચિંતન કરતા આગેવાનોએ જણાવ્યું હતું કે, જો ખેડૂતોને તેમની ખેતપેદાશનો યોગ્ય ભાવ મળે અને ગુણવત્તાયુક્ત બિયારણ સાથે પૂરતું માર્ગદર્શન પૂરું પાડવામાં આવે, તો વધુ ઉત્પાદન મેળવવાની લ્હાયમાં થતો રાસાયણિક દવાઓ અને ખાતરનો અતિરેક ઘટાડી શકાય તેમ છે. ખેતી અને પશુપાલન આધારિત સાબરકાંઠા અને અરવલ્લી જિલ્લાના ખેડૂતોની પડખે ઊભા રહેવાની સહકારી સંસ્થાઓની નૈતિક જવાબદારી પર ખાસ ભાર મૂકવામાં આવ્યો હતો.
બદલાતી જીવનશૈલી અને ખેતીમાં રસાયણોના વધતા ઉપયોગથી ઊભી થતી સ્વાસ્થ્ય સમસ્યાઓ અંગે પણ ચિંતા વ્યક્ત કરવામાં આવી હતી. આવનારી પેઢીને સ્વસ્થ જીવન આપવા માટે ખેતીથી લઈને દૂધ અને શાકભાજીમાં ગુણવત્તા જાળવવી અત્યંત આવશ્યક છે. અંતમાં, આર્થિક રીતે સક્ષમ સંસ્થાઓને જરૂરિયાતમંદો માટે સમાજ ઉપયોગી સેવાકાર્યો કરવા અપીલ કરવામાં આવી હતી અને સંચાલક મંડળ દ્વારા તમામ સભાસદો તથા મહેમાનોનો આભાર માની સભાનું સમાપન કરવામાં આવ્યું હતું.
About the Author
