બાયપાસ રોડના સિલ્વર પ્લાઝા કોમ્પ્લેક્સમાં દરોડો; બે વ્યક્તિ સામે ગુનો નોંધાયો
હિંમતનગર ગ્રામ્ય પોલીસની હદમાં બાયપાસ રોડ પર આવેલા સિલ્વર પ્લાઝા કોમ્પ્લેક્સમાં સ્પા-મસાજ સેન્ટરની આડમાં દેહવ્યવહારની પ્રવૃત્તિ ચાલતી હોવાની બાતમીના આધારે એન્ટી હ્યુમન ટ્રાફિકિંગ યુનિટ (AHTU) દ્વારા કાર્યવાહી હાથ ધરવામાં આવી હતી.
મળતી માહિતી મુજબ, AHTU ટીમે સમગ્ર મામલાની પ્રાથમિક ખરાઈ કરવા માટે ડમી ગ્રાહક મોકલ્યો હતો. ત્યારબાદ મળેલી માહિતીના આધારે ટીમે સ્પા સેન્ટર પર દરોડો પાડી તપાસ હાથ ધરી હતી.
દરોડા દરમિયાન પોલીસે રોકડ રૂ. ૩,૦૦૦ અને બે મોબાઇલ ફોન સહિત કુલ આશરે રૂ. ૧૩,૦૦૦નો મુદ્દામાલ કબજે કર્યો હોવાનું જાણવા મળ્યું છે. કાર્યવાહી દરમિયાન સ્થળ પરની પ્રવૃત્તિ અંગે જરૂરી તપાસ હાથ ધરવામાં આવી હતી.
આ મામલે રાજસ્થાનના વતની હોવાનું જણાવાતા સ્પા સેન્ટરના બે માલિકો સામે ગુનો નોંધવામાં આવ્યો છે. બંને સામે લાગુ પડતી કાયદાકીય જોગવાઈઓ હેઠળ કાર્યવાહી કરવામાં આવી હોવાનું પોલીસે જણાવ્યું છે.
AHTU હિંમતનગરની ટીમે સમગ્ર મામલે કાયદેસરની કાર્યવાહી હાથ ધરી વધુ તપાસ શરૂ કરી છે. તપાસ દરમિયાન સ્પા સેન્ટરની પ્રવૃત્તિ અને અન્ય કોઈ વ્યક્તિની સંડોવણી અંગે પણ માહિતી એકત્ર કરવામાં આવી રહી છે.
About the Author
