ગાંધીનગર: ગુજરાત રાજ્ય ચૂંટણી આયોગ દ્વારા સ્થાનિક સ્વરાજ્યની સંસ્થાઓની સામાન્ય ચૂંટણીઓ તથા પ્રસંગોપાત ખાલી પડેલી બેઠકોની પેટાચૂંટણીઓ માટેનો કાર્યક્રમ જાહેર કરવામાં આવ્યો છે. આ ચૂંટણીમાં ગાંધીનગર મહાનગરપાલિકા, ઓખા અને થરા નગરપાલિકાઓ સહિતની સંસ્થાઓનો સમાવેશ થાય છે. ચૂંટણી કાર્યક્રમ મુજબ મતદાન તા. 11 ઓક્ટોબર, 2026ના રોજ યોજાવાનું છે.
રાજ્ય ચૂંટણી આયોગે ચૂંટણી ફરજમાં રોકાયેલા કર્મચારીઓની કામગીરી અને સમયમર્યાદાને ધ્યાનમાં રાખીને મતદાનના બીજા દિવસે હાજરી અંગે સ્પષ્ટતા કરી છે. સામાન્ય રીતે મતદાન પૂર્ણ થયા બાદ ચૂંટણી કર્મચારીઓએ રાત્રે મોડે સુધી અથવા લાંબા સમયગાળા પછી મતદાન સામગ્રી પરત સોંપવાની પ્રક્રિયામાં જોડાવું પડે છે.
આ પરિસ્થિતિને ધ્યાનમાં રાખીને, મતદાનના બીજા દિવસે વહેલી સવારે મતદાન સામગ્રી પરત સોંપવા પહોંચતા અથવા લાંબા સમય સુધી ચૂંટણી ફરજ બજાવનારા કર્મચારીઓને ફરજના સમયગાળાને કારણે મુશ્કેલી ન પડે તે માટે આયોગે સૂચનાઓ જાહેર કરી છે.
સૂચના અનુસાર, જો કોઈ ચૂંટણી ફરજ પરના કર્મચારી મતદાનના બીજા દિવસે પોતાની મૂળ કચેરીમાં હાજર રહી ન શકે, તો તે દિવસની ગેરહાજરીને ચૂંટણી ફરજની હાજરી તરીકે ગણવાનો નિર્ણય લેવામાં આવ્યો છે. જોકે, આ માટે સંબંધિત કર્મચારીએ પોતાની મૂળ કચેરીમાં હાજર ન રહી શકવાનું કારણ ચૂંટણી ફરજ સાથે સંકળાયેલું હોવું જરૂરી છે.
રાજ્ય ચૂંટણી આયોગના સચિવ દ્વારા જાહેર કરાયેલી આ સૂચનામાં વધુમાં સ્પષ્ટ કરવામાં આવ્યું છે કે, આવી પરિસ્થિતિમાં કર્મચારીઓની હાજરી અંગે કોઈ વધારાની છૂટછાટ આપવામાં આવશે નહીં. આ નિર્ણયનો અમલ સૂચનામાં દર્શાવેલી શરતોને આધારે કરવાનો રહેશે.
About the Author
