સાબરડેરીનો ઐતિહાસિક નિર્ણય: દૂધ ઉત્પાદકોને રીટેઇન્ડ મની પેટે રેકોર્ડબ્રેક ₹૫૬૦ કરોડ ચૂકવવાની જાહેરાત -

Share News

હિંમતનગર, ૨૫ જૂન: સાબરકાંઠા અને અરવલ્લી જિલ્લાની જીવાદોરી સમાન સાબરડેરી દ્વારા પશુપાલકોના હિતમાં એક મોટો અને ઐતિહાસિક નિર્ણય લેવામાં આવ્યો છે. વર્ષ ૨૦૨૫-૨૬ માટે દૂધ ઉત્પાદકોની અપેક્ષા મુજબ સાબરડેરી દ્વારા રીટેઇન્ડ મની (ભાવફેર) સ્વરૂપે વિક્રમજનક ₹૫૬૦ કરોડની માતબર રકમ ચૂકવવાની સત્તાવાર જાહેરાત કરવામાં આવી છે.

સાબરકાંઠા અને અરવલ્લી જિલ્લાના ૩.૫ લાખથી વધુ દૂધ ઉત્પાદકોને દર ૧૦ દિવસે નિયમિત મળતા દૂધના પોષણક્ષમ ભાવોને કારણે પશુપાલન વ્યવસાય આજે ગ્રામીણ પરિવારો માટે નિયમિત આવકનું અને સ્વરોજગારીનું મોટું સાધન સાબિત થયો છે. આ વ્યવસાય દૂધ ઉત્પાદકોના સામાજિક અને આર્થિક વિકાસમાં મહત્વનું યોગદાન પૂરું પાડી રહ્યો છે.

ચોમાસાની ઋતુની શરૂઆતમાં ખેડૂતો અને પશુપાલકોને ખેતી માટે બિયારણ તથા ખાતર-દવા ખરીદવાની હોય, બાળકોની શિક્ષણ ફી ભરવાની હોય કે અન્ય સામાજિક પ્રસંગો હોય ત્યારે સ્થાનિક દૂધ મંડળીમાં વેચેલ દૂધની કિંમતના આધારે સાબરડેરી દ્વારા જૂન મહિનામાં ચૂકવવામાં આવતી રીટેઇન્ડ મની સ્વરૂપે તફાવતની રકમ માટે બંને જિલ્લાના દૂધ ઉત્પાદકો આતુરતાથી રાહ જોઈ રહ્યા હોય છે.

નિયામક મંડળની બેઠકમાં લેવાયો મહત્વનો નિર્ણય: સાબરડેરી દ્વારા હંમેશાં દૂધ ઉત્પાદકોના હિતોને પ્રાધાન્ય આપીને તેમની અપેક્ષાઓ પરિપૂર્ણ કરવા સતત પ્રયત્નો કરવામાં આવે છે. આ જ દિશામાં દૂધ ઉત્પાદકોને ચૂકવવાપાત્ર રીટેઇન્ડ મની નક્કી કરવા હેતુસર ૨૫મી જૂનના રોજ સાબરડેરીના નિયામક મંડળની એક મહત્વની બેઠક મળી હતી. આ બેઠકમાં સર્વાનુમતે નક્કી કરાયું છે કે આગામી તા. ૨૯ જૂનના રોજ તમામ પશુપાલકોના ખાતામાં આ રકમ જમા કરી દેવામાં આવશે.

વર્ષ ૨૦૨૫-૨૬ ના સમયગાળા માટે કિલો ફેટ દીઠ સરેરાશ ₹૧૦૦૭ લેખે પશુપાલકોને ચૂકવવામાં આવશે, જે પશુપાલકો માટે ખૂબ જ ઉત્સાહવર્ધક અને નફાકારક સાબિત થશે.

સંઘની ૬૧મી વાર્ષિક સાધારણ સભામાં સાબરડેરીના ચેરમેન શામળભાઈ પટેલે જણાવ્યું હતું કે, ૩૦ જૂન પહેલાં સાધારણ સભાની મંજૂરીની અપેક્ષાએ રીટેન્શન મની ચૂકવવાની જાહેરાત કર્યા મુજબ, નિયામક મંડળના સંપૂર્ણ સહકારથી આ રીટેન્શન મની સમયસર ચૂકવી આપવામાં આવશે. સૌના ઉમદા સહકારથી અને કરકસરયુક્ત વહીવટ સાથે સાબરડેરીની પ્રતિષ્ઠાને જાળવી રાખવા માટે સતત સનિષ્ઠ પ્રયાસો કરવામાં આવી રહ્યા છે.