તપાસ દરમિયાન સિવિલ અધિક્ષક ગેરહાજર જણાતા તંત્રના સવાલો; સુવિધાઓના અભાવે વાલીઓમાં ભારે રોષ
‘સત્યાર્થ ગુંજ ન્યુઝ’ દ્વારા પ્રસિદ્ધ કરાયેલા અહેવાલની વહીવટી તંત્ર પર ધારદાર અસર જોવા મળી છે. બડોલી ગામના ૧૨ જેટલા બાળકોને જોન્ડિસ (કમળો) થવાના ગંભીર મામલાને પગલે જિલ્લા પ્રશાસન તાત્કાલિક હરકતમાં આવ્યું છે. આ ઘટનાની ગંભીરતાને ધ્યાનમાં રાખીને જિલ્લા કલેક્ટર નારાયણસિંઘ સાદુએ સિવિલ હોસ્પિટલની અચાનક મુલાકાત લીધી હતી.
કલેક્ટરની સાથે જિલ્લા આરોગ્ય અધિકારી અને પ્રાંત કચેરીના અન્ય કર્મચારીઓ પણ સિવિલ હોસ્પિટલ પહોંચ્યા હતા. આ ઉચ્ચ અધિકારીઓના કાફલાએ હોસ્પિટલમાં દાખલ અને સારવાર લઈ રહેલા અસરગ્રસ્ત બાળકોની રૂબરૂ મુલાકાત લીધી હતી. તેઓએ બાળકોની સ્વાસ્થ્ય સ્થિતિ અંગે તાગ મેળવ્યો હતો. અધિકારીઓની આ સરપ્રાઇઝ વિઝિટને કારણે હોસ્પિટલના સ્ટાફમાં ભારે દોડધામ મચી ગઈ હતી.
જોકે, આ ઉચ્ચ સ્તરીય તપાસ દરમિયાન હોસ્પિટલ મેનેજમેન્ટની ગંભીર બેદરકારી છતી થઈ હતી. જિલ્લાના કલેક્ટર સહિતના ટોચના અધિકારીઓ હોસ્પિટલમાં હાજર હોવા છતાં, સિવિલ હોસ્પિટલના અધિક્ષક ફરજ પરથી ગાયબ જોવા મળ્યા હતા.
આ મુલાકાત દરમિયાન જિલ્લા કલેક્ટર અને આરોગ્ય અધિકારીએ બીમાર બાળકોના વાલીઓ સાથે ખાસ બેઠક યોજી હતી. આ બેઠકમાં વાલીઓએ હોસ્પિટલમાં પીવાના શુદ્ધ પાણી સહિતની પ્રાથમિક સુવિધાઓના અભાવ અંગે ઉગ્ર રજૂઆત કરી હતી. બીમાર બાળકોની સારવાર અને પૂરતી સગવડો ન મળવાના કારણે હાલાકી ભોગવી રહેલા વાલીઓમાં હોસ્પિટલ પ્રશાસન સામે ભારે રોષ જોવા મળ્યો હતો. અધિકારીઓએ વાલીઓની રજૂઆતો સાંભળીને યોગ્ય કાર્યવાહીનો ભરોસો આપ્યો છે.
About the Author
